Hvað er Cricut?

Í Hofsstaðaskóla eru til tvær Cricut vélar sem ákveðið var að staðsetja í textílmenntarstofunni með það að markmiði að samþætta textílmennt og upplýsingatækni þ.e. að nýta stafræna tækni í textílmennt. Ýmsir fjölbreyttir og skemmtilegir möguleikar eru í boði til að samþætta stafræna tækni og handverkið á skapandi hátt. Áhugi var á því að innleiða nýja kennsluhætti og nýja nálgun og veita nemendum tækifæri til að útfæra verkefni sín á fjölbreyttari hátt. Lögð var áhersla á endurnýtingu þ.e. að gefa eldri hlutum nýtt líf og að vekja áhuga á textílmennt hjá þeim sem eru áhugalitlir með því að víkka sjóndeildarhring þeirra og tengja við þeirra áhugasvið.

Skólinn á tvo Cricut skera (cutting plotter) en hann tilheyrir tegund af tækjum sem nefnast skurðarplotterar. Með Cricut er mögulegtað skera út í ýmis konar efni með hnífsblaði sem hreyfist við yfirborðið. Dæmi um efni sem m.a. er hægt að nota er: pappír, pappi, vínyll, textílefni, filt o.fl. Vélin hentar einstaklega vel í vinnu með ungum nemendum því hún er tiltölulega einföld í notkun. bæði er hægt að skera út fatalímmiða til að strauja á textíl og einnig er hægt að nota vélina til að skera út efni eða teikna á það. Þessa tækni viljum við færa nemendum til að auðga eigin verkefni og að færa gamlan textíl í endurnýjaðan búning.

Cricut vélin notar sinn eigin hugbúnað sem heitir Cricut design Space þar sem hægt er að hlaða inn SVG (vektor), jpg skrám eða hanna í forritinu sjálfu.

Hugbúnaðurinn er notendavænn og því ákjósanlegur með nemendum á þessu aldursstigi (miðstigi)